2009-07-14

للى اكتشف امريكا فى الاصل كان عطار

كنت جعان ومن شدة صوصوة العصافير فكرت قد ايه الاكل مهم فى الدين - التاريخ - الفن - الحروب - اخرة , وكمان التعبير عن الرفض : )

الاكل فى الدين :

1- للى طلع ادم وحواء من الجنة التفاحة , سيبك من انه تعليم بالمثل او مش تعليم بس الفكرة التفاحة

2- لما جاء الرسل لسيدنا ابراهيم وقرب منهم الاكل ولما مأكلوش قلق منهم - عشان من عادات البادية انه للى مش بياكل من اكل حد يعنى انه ناويله على شر - فقالولوه متخفش وبشروه انه حيكون ليه اولاد .

3- من الحاجات للى نزلت صريحة من السماء كمعجزة المائدة للى نزلت لسيدنا عيسى والحواريين - عشان يفطرو بعد صيامهم ل 30 يوم ويتطمئنو ان ربنا قبل صيامهم - وكانت مليانة خيرات .

4- ربنا نزل لليهود المن والسلوى وهما فى الصحراء عشان يقدرو يكملو , المن ده حاجة حلوة زى العسل كده والسلوى هو طائر السمان بيجى فى جماعات كبيرة ويستنى لحد ميصطدوه.

5- موضوع الشاه المسمومة لسيدنا محمد والاقاويل للى اتقالت عليها


الاكل فى التاريخ :

محمد على لما جه عشان يعمل مذبحة القلعة عزمهم على العشا - كانت حفلة كبيرة معمولة عشان توديع الجيش للى خارج يحارب - عشان يجو ويخلص عليهم

الاكل فى الفنون :

لوحة العشاء الاخير - للى بتمثل العشاء الاخير بين سيدنا عيسى والحواريين - لدافنشى وان لحد دلوقتى الناس بتتشائم من رقم 13 عشان دول عدد الاشخاص للى فى اللوحة , ومن دلق الملح عشان يهوذا الخائن الملح كان مدلوق قدامه فى اللوحة دى

الاكل والحروب وامريكا :

حروب كتير حصلت عشان التوابل والسيطرة على الهند عشان يجيبو منها التوابل , امريكا نفسها اكتشفوها اثناء مهما كانو بيدورو على طريق اسهل للهند عشان يجيبو التوابل و طبعا من اعظم المكتشفين بتوع التوابل ماجلان , فاسكو دا جاما

الاخرة :

طعام اهل الجنة اصلا معمول عشان يبسطهم وطعمه جميل ولذيذ , واهل النار مر ويع وفظيع عشان يحسو قد ايه هما كانو وحشين فى الدنيا

الاكل والديموقراطية :

عاوز تقول لا اعمال اضراب عن الاكل وابعت ايميلات لكل وسائل الاعلام والناس حتيجى تشوف انتا مش عاوز تاكل مم ليه وبكده تبقى وصلت رائيك وكل مكنت مهم كل مكان صوتك اعلى , وياسلام لو كنتو كتير وكلكم ناويين على الاضراب


كفاية كده عشان خالتو عملت الاكل اقوم اكل بقه , سلام

ليست هناك تعليقات: