اعمل ماتحب عشان تعرف تعمله صح

نظام التعليم ده حيجننى ياناس..من اول نكبة التنسيق وتحديد مستقبك بدرجات الجغرافيا والاقتصاد...انتقالا للكليات واللى بحس انه ف حاجة مش مظبوطة او انا للى مش متوافق معاها..حتكلم عن الحكاية ديه على كام مرة..عشان حطق خلاص.

التنسيق

اموت واعرف النظام ده اصله منين مين للى بيقول ان مجرى حياتك يتحدد كله على مجموع درجات ربنا العالم بتيجى ازاى او رغبات اللى حواليك فى انهم يشفوك فى مكان كان نفسهم يبقوا فيه , انا مثلا مادة الاحصاء رغم انها سهلة وكده مكنتش بطيقها وعكيت فيها وعشان الكام درجة للى نقضتهم فيهم اضطريت ادخل هندسة شبين الكوم الاول وبعدين احول تانى لهندسة اسكندرية..بصرف النظر على انى مكنتش عارف يعنى ايه هندسة ايام التنسيق زى مانا عارف دلوقتى..ولا بياخدوا ايه فيها ولا بتطلع ايه..ناس كتير فاكرين المهندس هو للى بيبنى عمارات :)
ولما تكتشف بعد كده انك مش بتحب مواد من اساسيات دراستك وغيره من المقالب الميرى للى بتشوفها .
طب ليه من الاول ميعملوش حاجاة تفهمك كل كلية بتطلع ايه وبيدرسوا ايه ..وكمان يسيبوهم من موضوع الدرجات وده ويعملوا اختبارات قدرات لكل كلية وعلى اساسها يحددوا للى ياخدوه وكده يبقى كله بيدرس للى بيحبه وحيبدع فى المجال ده , فانا مش مع المقولة بتاعت حب ماتعمل على الاقل مش بعرف اطبقها مع نفسى...كان نفسى اعمل ما احب اظن كنت حابقى احسن